Formenn aðildarfélaga Starfsgreinasambands Íslands hafa verið boðaðir til formannafundar á þriðjudaginn kemur.  Einungis eitt mál verður á dagskrá, en það er staðan í kjaraviðræðunum við Samtök atvinnulífsins og aðkoma ríkisstjórnarinnar að hugsanlegu samkomulagi við SA.

Eins og fram hefur komið hér á heimasíðunni þá eru aðilar innan verkalýðshreyfingarinnar nokkuð bjartsýnir að það náist samkomulag við Samtök atvinnulífsins.  Hins vegar liggur ekki fyrir á þessari stundu hvort  aðkoma ríkisstjórnarinnar að samkomulaginu sé nægileg til að forða uppsögn kjarasamninga í haust.  Væntanlega mun það skýrast á fundinum á þriðjudaginn.