Formaður fundaði með starfsmönnum tveggja vakta Norðuráls í morgun, þ.e.a.s. C og A vakt. Fundirnir voru afar góðir og gagnlegir en þar fór formaður yfir stöðuna í þeim kjaraviðræðum sem nú standa yfir við forsvarsmenn Norðuráls.

Eins og fram hefur komið hér á síðunni þá hafa tveir samningafundir verið haldnir hjá ríkissáttasemjara og hafa þeir fundir fyrst og fremst verið vinna við að lagfæra textabreytingar í kjarasamningi.

Á fundinum í morgun var kallað eftir því hvaða atriði starfsmenn vildu leggja mesta áherslu á í þeim viðræðum sem framundan eru og komu starfsmenn með fjölmargar tillögur hvað það varðar. Einnig báru starfsmenn upp allmargar spurningar til formanns er varða hin ýmsu mál varðandi komandi kjarasamningaviðræður.

Formaður greindi starfsmönnum frá því að hann teldi afar mikilvægt að í þessum kjaraviðræðum skyldi verða lögð áhersla á að jafna launakjör starfsmanna Norðuráls við starfsmenn sem starfa í sambærilegum iðnaði.

Á föstudaginn verður fundað með D og B vöktum þar sem farið verður yfir hvaða atriði þær vaktir vilja leggja áherslu á í komandi kjaraviðræðum.