Viðræðunefnd Starfsgreinasambands Íslands fundaði með fulltrúum Samtaka atvinnulífsins í höfuðstöðvum SA í morgun og var þetta fyrsti formlegi samningafundurinn. Rétt er þó að geta þess að SGS afhenti SA kröfugerð sína 22. júní eða fyrir rúmum 2 mánuðum síðan.

Á fundinum var gengið frá viðræðuáætlun og voru samningsaðilar sammála því að reyna eftir fremsta megni að láta þessar kjaraviðræður ganga eins hratt og vel fyrir sig og kostur er. Fram kom í máli formanns SGS að æði margt hafi breyst til verri vegar frá því að kröfugerðin var lögð fram 22. júní þar sem hinir ýmsu kostnaðarliðir hafa hækkað umtalsvert og því ljóst að alvarleg staða er komin upp. Það verður sameiginlegt verkefni að ná að ganga frá kjarasamningum þannig að okkur takist að auka ráðstöfunartekjur okkar félagsmanna þar sem markmiðið er að allir geti framfleytt sér frá mánuði til mánaðar og haldið mannlegri reisn.