Formaður átti fund með fulltrúum Hagsmunasamtaka heimilanna í morgun, þeim Andreu Ólafsdóttur, formanni samtakanna, Þórði Sigurðssyni og Ragnari Þór Ingólfssyni, stjórnarmanni í VR. Málefni fundarins voru hagsmunir heimilanna og hinar ýmsu hugmyndir er lúta að stéttarfélagsbaráttu fyrir almenning í þessu landi.

Það er afar ánægjulegt að sjá hversu gríðarlega öflug Hagsmunasamtök heimilanna hafa verið á undanförnum árum við að gæta að hag íslenskra heimila og hafa samtökin hvergi hvikað frá hinum ýmsu réttindamálum er lúta að íslenskum heimilum. Hagsmunasamtök heimilanna hafa áhuga á að útvíkka starfsemi samtakanna, meðal annars er lítur að stéttarfélagsaðkomu og nægir að nefna í því samhengi grein sem forsvarsmenn samtakanna skrifuðu ekki alls fyrir löngu um stéttabaráttu á 21. öldinni. Verkalýðsfélag Akraness hefur ávallt stutt Hagsmunasamtök heimilanna í sinni baráttu og meðal annars studdi félagið HH með fjárstuðningi fyrir 2 árum síðan og hefur samstarf VLFA við HH ávallt verið mjög gott.