Verkalýðsfélag Akraness óskar öllum sjómönnum og fjölskyldum þeirra innilega til hamingju með daginn. Lagður var blómsveigur að minningarreit um týnda sjómenn í kirkjugarðinum á Akranesi og við guðsþjónustu í Akraneskirkju voru íslenskum sjómönnum þökkuð mikilvæg störf við oft og tíðum krefjandi aðstæður. Í guðsþjónustunni voru heiðraðir þeir Erling Þór Pálsson og Haraldur Jónsson, fyrrum sjómenn, fyrir störf sín til sjós. Að lokinni guðsþjónustu var lagður blómsveigur að styttu sjómannsins á Akratorgi en styttan var reist til minningar um látna sjómenn. Sjómannadagurinn er mikilvægur hátíðisdagur, bæði til að minnast þeirra sem hafa í gegnum árin og áratugina stundað sjóinn sem og til að þakka þeim sem sinna enn þessari mikilvægu starfsgrein. Sjómenn eiga stóran sess í sögu þjóðarinnar en það er Verkalýðsfélag Akraness sem stendur fyrir þessum dagskrálið ásamt sóknarpresti Akraneskirkju.