Boðað er til kvennaverkfalls þann 24. október næstkomandi undir yfirskriftinni Kallarðu þetta jafnrétti?  Verkalýðsfélag Akraness skorar á félagsfólk að leggja sitt af mörkum í baráttunni fyrir jafnrétti á þessum degi. VLFA skorar einnig á fyrirtæki að sýna samstöðu í verki svo konur og kvár geti lagt niður störf þennan dag, án skerðingar á launum.

Dagana 2. og 3. október stendur yfir trúnaðarmannanámskeið á vegum Verkalýðsfélags Akraness og fer það fram í húsnæði Símenntunar Vesturlands á Smiðjuvöllum. Námskeiðið sitja 8 trúnaðarmenn félagsins en námskeið sem þessi skiptast í mismunandi hluta og því misjafnt hversu marga hluta hver trúnaðarmaður hefur tekið.

Á stjórnarfundi Verkalýðsfélags Akraness í gær voru fimm stjórnarmeðlimir kvaddir eftir langt og farsælt starf. Þetta eru þau Alma María Jóhannsdóttir, Elí Halldórsson, Jóna Ágústa Adolfsdóttir, Sigríður Sigurðardóttir og Sigurður Guðjónsson. Þau hafa öll starfað í núverandi stjórn frá því hún tók við árið 2003 og hafa því tekið þátt í að byggja upp félagið í öllum þeim áskorunum sem upp hafa komið á þeim tíma. Formaður félagsins þakkaði þeim fyrir gott samstarf og tók fram hversu mikilvægt það er að hafa fólk í stjórninni sem er tilbúið að leggja sig fram í baráttunni og gefa af sér í starfinu. Jafnframt þökkuðu fráfarandi stjórnarmeðlimir fyrir samstarfið og óskuðu nýjum meðlimum alls hins besta í sínu starfi. Á meðfylgjandi mynd má sjá Sigríði Sigurðardóttur (Systu), Elí Halldórsson, Sigurð Guðjónsson, Jónu Á. Adolfsdóttur og Vilhjálm Birgisson.

Atkvæðagreiðslu um nýjan kjarasamning Starfsgreinasambands Íslands og Sambands íslenskra sveitarfélaga er lokið. Niðurstöður liggja nú fyrir og var samningurinn samþykktur með rúmlega 78% þeirra sem greiddu atkvæði.

Símenntun á Vesturlandi kynnir tveggja daga kjötiðnaðarnámskeið 30. sept - 1. okt. 2023

Nánari upplýsingar www.simenntun.is 

Verkalýðsfélag Akraness heldur opinn kynningarfund um framlengdan kjarasamning Starfsgreinasambands Íslands við Samband íslenskra sveitafélaga í golfskálanum á Akranesi mánudaginn 18. september og hefst kynningin kl 17:00

Rafræn atkvæðagreiðsla um nýjan kjarasamning SGS og Sambands íslenskra sveitarfélaga hefst í dag 14. september kl. 12. Atkvæðagreiðslan er sameiginleg hjá þeim 18 aðildarfélögum sem eru aðilar að samningnum og lýkur henni þann 26. september kl. 9:00.

Í gær undirrituðu 18 aðildarfélög Starfsgreinasambands Íslands kjarasamning við Samband íslenskra sveitarfélaga en Verkalýðsfélag Akraness er aðili að þessum samningi og gildir hann fyrir starfsmenn Akraneskaupstaðar, Hvalfjarðarsveitar og hjúkrunar- og dvalarheimilisins Höfða.

Dagana 6. og 7. september stóð Starfsgreinasamband Íslands fyrir fræðsludögum fyrir starfsfólk aðildarfélaga þess og fóru þeir fram á Hótel Keflavík. Starfsmenn skrifstofu Verkalýðsfélags Akraness tóku þátt í fræðsludögunum að þessu sinni ásamt rúmlega 30 öðrum þátttakendum og var aðstaðan öll til fyrirmyndar. 

Í gær, miðvikudaginn 30. ágúst, bauð Verkalýðsfélag Akraness eldri félagsmönnum sínum í árlega dagsferð. Ferðin heppnaðist vel og var dagurinn einstaklega ánægjulegur enda eru þessar ferðir ómissandi hluti af hefðum félagsins.

Í gær kom stjórn Verkalýðsfélags Akraness saman en umtalsverð endurnýjun varð í stjórninni eftir síðustu kosningar. Þá komu 7 nýir einstaklingar inn sem starfa vítt og breitt um félagssvæði VLFA. Þetta er ungt fólk sem er áhugasamt um verkalýðsmál og er afar gott að sjá hversu auðvelt var að fá ungt fólk til trúnaðarstarfa fyrir félagið. Á fundinum bauð formaður þau sérstaklega velkomin í aðalstjórn félagsins. 

Símenntun á Vesturlandi og Verkalýðsfélag Akraness áætla að setja af stað frístunda- og starfsþróunarnámskeið í vetur.

Til þess að framboð á námskeiðum verði í samræmi við óskir félagsfólks biðjum við okkar frábæra félagsfólk að svara meðfylgjandi könnun.