Eins flestir muna þá var gengið frá kjarasamningum á hinum almenna vinnumarkaði þann 5. maí 2011 undir heitinu „samræmd launastefna“. En í þessum kjarasamningum skuldbundu Samtök atvinnulífsins og aðildarfélög Alþýðusambands Íslands, að undanskildu Verkalýðsfélagi Akraness, sig til þess að ganga frá öllum sínum kjarasamningum á þeim nótum að launahækkanir yrðu ekki hærri en 11,4% í þriggja ára samningi.

Undanfarna viku hefur verið unnið að endurbótum í orlofshúsi félagsins að Efstaási í Svínadal. Þar var skipt um eldhúsinnréttingu og er nú til dæmis komin uppþvottavél í húsið sem ekki var áður. Einnig var sett upp ný innrétting í baðherbergið. Félagið festi kaup á orlofshúsinu síðasta sumar og hefur það verið mjög vel nýtt síðan þá, jafnt að sumri sem vetri.

Eins og allir muna stóðu hjúkrunarfræðingar á Landsspítalanum í mikilli kjaradeilu á síðasta ári og endaði hún með því að ríkisstjórnin ákvað að hækka laun þeirra í gegnum svokallaða stofnanasamninga. Sú hækkun nam um 7%. Í kjölfar þessarar hækkunar kom eðlilega krafa frá öðum kvennastéttum innan heilbrigðisstofnana um sambærilega launahækkun og gerðist á Landspítalanum. Á grundvelli þessa þrýstings ákvað ríkisstjórnin þann 21. janúar 2013 að hækka laun kvennastétta á heilbrigðisstofnunum um 4,8% undir heitinu „jafnlaunaátak.“   

Á ársfundi lífeyrissjóðs Festu sem haldinn var 23. apríl síðastliðinn lagði formaður fram fyrirspurn um hvort ekki væri eðlilegt að allar afskriftir sem sjóðurinn gerir séu sundurgreindar nákvæmlega í ársreikningi. 

Í dag er síðasti dagur fyrir þá sem fengu orlofshús í endurúthlutun til að greiða leiguna. Hægt er að greiða leiguna með korti inni á Félagavefnum, millifæra á reikning sem uppgefinn var í úthlutunarbréfi eða koma á skrifstofuna á Sunnubraut og ganga frá leigunni þar. 

Félagsskírteini VLFA veitir félagsmönnum þess ýmsa afslætti eins og sjá má hér á heimasíðunni. Nú var félagið enn að bæta við þau kjör sem bjóðast félagsmönnum með því að gera samning við Knattspyrnufélag ÍA um kaup á  ársmiðum sem gilda á alla heimaleiki Skagamanna í Pepsideildinni í sumar. Hægt er að velja um þrennskonar ársmiða - Brons, Silfur og Gull. Ársmiðarnir gilda allir á alla heimaleiki í Pepsideild karla en misjafnt er hvað er innifalið þess utan. Innifalinn í öllum ársmiðunum er stuðningsmannafundur með þjálfara liðsins, leikmönnum og stjórn. Þegar komið er yfir í Silfurmiðann bætist til dæmis við kaffi og meðlæti í öllum hálfleikjum en með Gullmiðanum fylgir einnig aðgangur að VIP fundum fyrir leiki þar sem þjálfari liðsins fer yfir leikinn og tölfræðina og núverandi og fyrrverandi leikmenn mæta á svæðið.

Í gær var síðasti dagur fyrir þá sem fengu úthlutað orlofshúsi í fyrri úthlutun til að ganga frá greiðslu leigu. Nú er búið að losa allar ógreiddar bókanir og eftir standa 50 lausar vikur. Næstkomandi mánudag fer fram endurúthlutun og þá verður þessum lausu vikum úthlutað til þeirra sem ekki fengu úthlutað í fyrri úthlutun, auk þess sem hægt er að leggja inn nýjar umsóknir í dag og á Félagavefnum um helgina.

Í kjarasamningum  VLFA við Norðurál árið 2011 var samið við forsvarsmenn fyrirtækisins um stóriðjuskóla fyrir starfsmenn þess en það hafði verið baráttumál starfsmanna um alllanga hríð. Grunnnám stóriðjuskólans er þrjár annir og gefur þeim starfsmönnum sem því ljúka launahækkun upp á 5%. Framhaldsnám skólans mun svo gefa 4% til viðbótar. Í stóriðjuskólanum öðlast starfsmenn aukna færni og þekkingu á lykilferlum við örugga og hagkvæma framleiðslu á áli. Þannig er það bæði hagur starfsmanna og fyrirtækisins að hafa þetta nám innan Norðuráls.

Gríðarlega jákvæð tíðindi bárust í dag hvað atvinnumál varðar en forstjóri Hvals hf tilkynnti að hvalveiðar og vinnsla myndu hefjast í sumar eftir 2 ára hlé. Það liggur fyrir að allt að 150 manns muni fá atvinnu tengda þessum veiðum sem skiptir gríðarlega miklu máli fyrir okkur Akurnesinga og nærsveitir og reyndar samfélagið í heild sinni. Það hefur verið slegist um að fá störf hjá Hval þegar vertíðin stendur yfir enda eru tekjumöguleikarnir umtalsverðir í ljósi þess að unnið er á sólarhringsvöktum yfir vertíðina. Sem dæmi voru meðallaun í vinnslunni yfir 700 þúsund krónur á vertíðunum árin 2009 og 2010 og þessar miklu tekjur skila sér svo sannarlega inn í samfélagið bæði hvað varðar útsvarstekjur fyrir sveitarfélögin og ekki síður hvað varðar verslun og þjónustu.

Um 200 manns tóku þátt í hátíðarhöldum vegna 1. maí á Akranesi í gær. Dagskráin hófst með kröfugöngu kl. 14:00, og annaðist Skólahljómsveit Akraness hljóðfæraleik í göngunni af miklum myndarskap.

Fréttabréf Verkalýðsfélags Akraness er komið út og verður dreift til allra heimila og fyrirtækja á Akranesi og í nágrenni í vikunni. Þeir félagsmenn sem búa utan póstnúmera 300 og 301 fá fréttabréfið sent heim til sín.