Gríðarlega jákvæðar fréttir berast nú um hækkun á heimsmarkaðsverði á áli en álverð hefur hækkað um 27% frá því í lok febrúar. Þá var álverðið í sögulegu lágmarki eða í 1.250 dollurum fyrir tonnið en í dag stendur tonnið í 1.585 dollurum.

Rétt í þessu heimsóttu krakkar í 7. bekk Brekkubæjarskóla skrifstofu félagsins ásamt Jónu Adolfsdóttur, skólaliða. Jóna situr í trúnaðarráði Verkalýðsfélags Akraness.

Formaður félagsins fór stuttlega með þeim yfir starfsemi stéttarfélaga, hver helstu verkefni verkalýðshreyfingarinnar væri og er alltaf ánægjulegt að fá heimsóknir frá grunnskólum bæjarins.

Nú liggur fyrir að ekki verður unnið hrefnukjöt hér á Akranesi eins og til stóð en hrefnuvinnslan hefði skilað allt að 30 nýjum störfum ef af hefði orðið.

Félag hrefnuveiðimanna hefur hins vegar náð samkomulagi við kjötvinnsluna Esju í Reykjavík um að þar verði hrefnukjöt komandi vertíðar unnið, en veiðar hefjast eftir hálfan mánuð. Gunnar Bergmann Jónsson framkvæmdastjóri Félags hrefnuveiðimanna segir að yfirlýsingar Steingríms J. Sigfússonar sjávarútvegsráðherra um endurskoðun hvalveiða eftir þessa vertíð og hugsanlega stöðvun þeirra hafi kippt stoðunum undan áformum um uppsetningu vinnslustöðvar á Akranesi. Þá hafi yfirvofandi lokun Faxaflóasvæðis vegna hvalaskoðunar þýtt að vinnslustöð á Akranesi væri óhagkvæm. Hér er um áfall að ræða fyrir atvinnulíf á Akranesi enda voru bundnar miklar vonir við að vinnslan myndi skapa fjölda starfa eins og áður hefur komið fram.

Jóhanna Sigurðardóttir forsætisráðherraEins og fram kom í Morgunblaðinu í gær þá er lögð mikil áhersla á að gerð verði þjóðarsátt vegna þess ástands sem nú ríkir í íslensku efnahagslífi. Það var einnig haft eftir Jóhönnu Sigurðardóttur forsætisráðherra að ríkisstjórnin hefði kallað aðila vinnumarkaðarins til fundar í dag til að geta tekið mið af sjónarmiðum þeirra, enda leggur ríkisstjórnin mikla áherslu á þjóðarsátt um þau verkefni sem framundan eru.

Forsvarsmenn Hagsmunasamtaka heimilanna óskuðu eftir að funda með formanni félagsins um þá alvarlegu stöðu sem upp er komin vegna stóraukinnar skuldastöðu heimilanna í kjölfar bankahrunsins.

Hátíðarhöldin vegna 1. maí heppnuðust einstaklega vel á Akranesi í dag.  Þó nokkur  fjöldi fólks kom í hina árlegu kröfugöngu í tilefni dagsins.

Hins vegar var salurinn þar sem hátíðardagskráin fór fram fullur af fólki. Boðið var uppá tónlistaratriði sem voru flutt annars vegar af Kvennakórnum Ym og hins vegar af Grundartangakórnum.

Eins og venjulega verður 1. maí haldinn hátíðlegur á Akranesi á morgun.

Dagskráin er á þá leið að safnast verður saman kl. 14:00 við Kirkjubraut 40 þaðan sem farið verður í kröfugöngu um neðri Skaga. Að göngu lokinni verður hátíðardagskrá í sal Verkalýðsfélags Akraness á 3ju hæð Kirkjubrautar 40.

Fréttablað Verkalýðsfélag Akraness er nú tilbúið og verður borið í hús á morgun. Það er ánægjulegt að geta lagt kvennaknattspyrnunni á Akranesi lið en 3. flokkur kvenna mun sjá um útburð blaðsins.

Vinnu við fréttablað Verkalýðsfélags Akraness er nú að ljúka og er áætlað að hægt verði að koma því í dreifingu fimmtudaginn 30. apríl.

Fréttablað VLFA hefur verið gefið út tvisvar á ári síðan ný stjórn tók við, fyrir 1. maí og aftur í desember. Hægt er að lesa áður útgefin fréttablöð með því að smella hér.

Í dag leit Guðbjartur Hannesson, frambjóðandi Samfylkingar í Norðvesturkjördæmi og forseti Alþingis við á skrifstofu félagsins. Gerði Guðbjartur formanni grein fyrir helstu stefnumálum flokksins í komandi kosningabaráttu og átti formaður gott spjall við hann.

Hagsmunasamtök heimilanna sendu frá sér fréttatilkynningu á miðvikudaginn var um þá ályktun sem samþykkt var á aðalfundi Verkalýðsfélags Akraness á þriðudaginn sl.  Heimasíða samtakanna er www.heimilin.is

Ályktun sem aðalfundur Verkalýðsfélags Akraness samþykkti á fundi sínum í gær um vanda heimilanna hefur vakið gríðarlega jákvæða athygli.  Sem dæmi þá hafði forsvarsmaður í Hagsmunasamtökum heimilanna samband við formann og lýsti yfir gríðarlegri ánægju með ályktun aðalfundarins en samtökin hafa lengi beðið eftir viðbrögðum verkalýðshreyfingarinnar vegna bráðs vanda skuldsettra heimila.