Í gær var haldinn síðasti kynningarfundurinn sem formaður VLFA hélt fyrir starfsmenn Norðuráls um efni nýgerðs samnings um launalið kjarasamnings Norðuráls en formaður hélt eina fimm kynningarfundi í þessari viku.

Nýtt samkomulag um launalið kjarasamnings verður kynnt fyrir starfsmönnum Norðuráls næstu daga og eru starfsmenn hvattir til að mæta á kynningarfund, kynna sér efni samningsins og taka afstöðu til samningsins með kosningu. Sérstaklega er vakin athygli á því að nú er búið að bæta við kynningu fyrir starfsmenn Kerfóðrunar sem boðað hefur verið til í kvöld kl. 19:30 á vinnustaðnum.

Í húsakynnum Ríkissáttasemjara  var rétt í þessu undirritað samkomulag um hækkun á launalið kjarasamnings Norðuráls sem hefur verið laus frá 1. janúar sl. Formaður Verkalýðsfélags Akraness hefur átt í viðræðum við forstjóra fyrirtækisins á liðnum vikum til lausnar á þessari erfiðu kjaradeilu sem lauk eins og áður sagði með undirritun rétt áðan.

Húsakynni ríkissáttasemjaraBoðað hefur verið til samningafundar í húsakynnum ríkissáttasemjara á morgun kl. 10 vegna launaliðar kjarasamnings Norðuráls. Eins og áður hefur komið fram hér á heimasíðunni þá rann kjarasamningur starfsmanna út um síðustu áramót og hafa starfsmenn því verið án launahækkana í rétt um 9 mánuði.

Vegna forfalla er bústaður félagsins í Kjós laus nú um næstu helgi, 23.-26. september.Í bústaðnum eru þrjú tvíbreið rúm auk þess sem aukadýnur eru til staðar en nánari upplýsingar um bústaðinn er að finna hér.

Það  er þyngra en tárum taki að verða vitni að því hvernig svokallaðar vinaþjóðir koma fram við smáþjóð eins og okkur Íslendinga.  Í kjölfar bankahrunsins settu Bretar á okkur hryðjuverkalög sem hafa að öllum líkindum kostað þjóðina tugi milljarða króna og því til viðbótar liggur fyrir að orðspor þjóðarinnar hefur beðið verulegan skaða af á alþjóðavettvangi vegna þessarar ákvörðunar breskra stjórnvalda.

Verkalýðsfélag Akraness stóð fyrir fundi í Bíóhöllinni í gær með starfsmönnum Norðuráls vegna kjaradeilu sem félagið á í við Norðurál en eins og margoft hefur komið fram hér á heimasíðunni þá rann launaliður kjarasamningsins út 1. janúar síðastliðinn. Ágætis mæting var á fundinn en um 170 manns mættu en þetta er þriðji kynningar- og samstöðufundurinn sem félagið heldur á liðnum mánuðum þar sem farið er yfir stöðu mála.

Félagið vill enn og aftur minna á gríðarlega mikilvægan samstöðu- og kynningarfund fyrir starfsmenn Norðuráls sem haldinn verður í Bíóhöllinni í kvöld kl. 20:30.

Mjög mikilvægt er að allir starfsmenn sem ekki eru á vakt á þessum tíma mæti á fundinn.

Kynningar- og samstöðufundur verður haldinn fyrir starfsmenn Norðuráls næstkomandi fimmtudag, 15. september. Fundurinn fer fram í Bíóhöllinni og hefst kl. 20:30. Á fundinum mun formaður félagsins fara yfir stöðu mála en launaliður starfsmanna hefur verið laus frá áramótum. Einnig verður farið yfir hvað hægt sé að gera og ekki síst hvað starfsmenn vilja gera í þessari erfiðu stöðu. Því er gríðarlega mikilvægt að allir sem mögulega geta mæti á fundinn og sýni þannig samstöðu í verki.  

Síðastliðinn föstudag héldu eldri félagsmenn Verkalýðsfélags Akraness ásamt mökum í sína árlegu dagsferð á vegum félagsins. Þátttakendur voru um 100 talsins auk fulltrúa frá félaginu. Þessi ferð er árlegur liður í starfsemi félagsins og að þessu sinni var ferðinni heitið til Reykjavíkur undir dyggri leiðsögn Björns Inga Finsen.

Nú er liðinn 251 dagur frá því launaliður kjarasamnings Norðuráls rann út og hafa formlegir samningafundir ekki borið árangur til þessa. Krafa Verkalýðsfélags Akraness í þessum viðræðum er jöfnuður við verksmiðjur í sambærilegum iðnaði en því miður hafa launakjör hjá Norðuráli verið töluvert lakari en gerist í öðrum sambærilegum verksmiðjum.

Kjarasamningur Verkalýðsfélags Akraness við Samband íslenskra sveitarfélaga sem undirritaður var þann 7. júlí síðastliðinn hefur nú verið prentaður. Þeir félagsmenn sem starfa fyrir sveitarfélögin geta nálgast innbundið eintak af samningnum á skrifstofu félagsins að Sunnubraut 13. Hægt er að nálgast vefútgáfu af samningnum hér og einnig má nálgast kauptaxtana hér.