Félagsskírteini VLFA veitir félagsmönnum þess ýmis sérkjör og afslætti eins og sjá má hér á heimasíðunni. Meðal þeira sérkjara sem félagsmönnum bjóðast eru kaup á  ársmiðum sem gilda á alla heimaleiki Skagamanna í fyrstu deildinni í sumar. Hægt er að velja um þrennskonar ársmiða - Brons, Silfur og Gull. Ársmiðarnir gilda allir á alla heimaleiki en misjafnt er hvað er innifalið þess utan. Innifalinn í öllum ársmiðunum er stuðningsmannafundur með þjálfara liðsins, leikmönnum og stjórn. Þegar komið er yfir í Silfurmiðann bætist til dæmis við kaffi og meðlæti í öllum hálfleikjum en með Gullmiðanum fylgir einnig aðgangur að VIP fundum fyrir leiki þar sem þjálfari liðsins fer yfir leikinn og tölfræðina og núverandi og fyrrverandi leikmenn mæta á svæðið.

Á morgun miðvikudag verður haldinn kynningarfundur vegna raunfærnimats í skipsstjórn, en raunfærnimat getur hentað þeim sem starfað hafa á sjó í 5 ár eða lengur og hafa áhuga á að öðlast stýrimanns- og skipstjórnarréttindi.

Þeir sem fengu úthlutað orlofshúsi í úthlutuninni 14. apríl eiga að greiða leiguna í síðasta lagi í dag 2. maí og eru því hvattir til að drífa í því sem fyrst. Eins og kemur fram í úthlutunarbréfi sem allir fengu sent og er einnig að finna inni á Félagavefnum,, er hægt að millifæra leiguna inn á bankareikning 0186-05-570355 kt. 6802696889, eða greiða með greiðslukorti inni á Félagavefnum og þar með tryggja sér úthlutaða viku.

Vel yfir 200 manns tóku þátt í hátíðarhöldum vegna 1. maí á Akranesi í gær og var mikil stemning meðal þátttakenda. Hátíðardagskráin hófst kl. 14:00 með kröfugöngu sem var óvenjulega mannmörg í ár, en veður var milt og gott og göngufólki afar hagstætt. Margir voru með skilti og kröfuspjöld í göngunni og Skólahljómsveit Akraness annaðist undirleik af miklum myndarskap.

Nú klukkan 12 lauk kosningu meðal starfsmanna Klafa um nýgerðan kjarasamning. Kjörsókn var 100%, en allir starfsmenn fyrirtækisins greiddu atkvæði um samninginn. Kosningin fór þannig að allir sögðu já, enginn sagði nei og enginn var auður eða ógildur.

 Í gær var gengið frá kjarasamningi við Samtök atvinnulífsins vegna starfsmenn Klafa á Grundartanga. En starfsmenn Klafa sjá um út- og uppskipanir fyrir stóriðjufyrirtækin á svæðinu. Kjarasamningurinn er nánast algerlega í anda þess samnings sem gengið var frá fyrir starfsmenn Elkem Ísland á Grundartanga og eru starfsmenn að hækka í heildarlaunum með öllu um yfir 30.000 krónur á mánuði.

Hátíðarhöld vegna 1. maí verða með hefðbundnu sniði á Akranesi í ár, safnast verður saman við Kirkjubraut 40 klukkan 14:00 og genginn hringur á Neðri-Skaga með hina taktvissu Skólahljómsveit Akraness í broddi fylkingar. Eru íbúar hvattir til að fjölmenna með skilti og kröfuspjöld og taka þátt í kröfugöngunni og dagskránni allri.

Hefur þú starfað á sjó í 5 ár eða lengur og hefur áhuga á að ná þér í stýrimanns- og skipstjórnarréttindi? Þá gæti raunfærnimat hentað þér.

Raunfærnimat í skipsstjórn miðar að því að meta þá færni sem viðkomandi býr yfir inn í skólakerfið óháð því hvernig hennar hefur verið aflað. Metið er upp í skipstjórn á B stigi (45 m. skip). Þátttakendur fara í kjölfarið í skóla og ljúka því námi sem eftir stendur.

Vegna útfarar Óttars Arnar Vilhjálmssonar verður skrifstofa Verkalýðsfélags Akraness lokuð frá kl. 12 í dag. 

Rétt í þessu lauk aðalfundi Verkalýðsfélags Akraness. Á dagskrá voru hefðbundin aðalfundarstörf, farið var yfir skýrslu stjórnar fyrir liðið starfsár, Ómar Davíðsson, endurskoðandi félagsins, fór yfir ársreikninga sem sýndu góða afkomu hjá öllum sjóðum félagsins og fór fundurinn að öðru leyti fram samkvæmt dagskrá (myndir frá fundinum má sjá hér).

Nú hefur farið fram úthlutun vegna sumarleigu orlofshúsa félagsins sumarið 2014. Bréf til allra þeirra sem sem sóttu um verða póstlögð í dag, og þar kemur fram hvort þeir hafi fengið úthlutað eða ekki. Þessi bréf eru einnig sýnileg inni á Félagavefnum og þar hefur einnig myndast bókun hjá þeim sem fengu úthlutað.

Í dag rennur út frestur til að sækja um orlofshús eða -íbúð fyrir sumarið svo þeir sem eiga eftir að skila umsókn eru hvattir til að bíða ekki lengur.

Á mánudaginn fer úthlutun fram á þann hátt að allar umsóknir eru skráðar inn í tölvukerfi félagsins. Kerfið raðar umsóknum í röð eftir punktastöðu, þ.e. þeir umsækjendur sem flesta hafa punktana eru fremstir í röðinni og svo koll af kolli. Ef punktar tveggja eru jafnir raðast sá eldri framar í röðina. Kerfið vinnur sig síðan í gegnum umsóknirnar og úthlutar vikum eftir punktastöðu. Varðandi ávinnslu punkta, þá vinnur félagsmaður sér inn einn punkt fyrir hvern þann mánuð sem hann greiðir félagsgjald, en fái hann úthlutað dragast 24 eða 36 punktar frá punktastöðu hans.