Mikið hefur gengið á í bústað félagsins í Svarfhólsskógi, Svínadal undanfarið. Þar hafa staðið yfir framkvæmdir sem nú sér fyrir endann á.

Það er óhætt að segja að bústaðurinn hafi fengið algera andlitslyftingu því skipt var um mestallt gólfið og gólfefni ásamt því að eldhúsinnrétting og tæki voru endurnýjuð. Tækifærið var notað og skipulagi eldhússins breytt til hins betra með því að opna það og við þá breytingu er mun rýmra um dvalargesti.

Bæjarstjórn Akraness samþykkti á fundi sínum í gær að greiða starfsmönnum Akraneskaupstaðar eingreiðslu að fjárhæð 60.000.- miðað við fullt starf og hlutfallslega miðað við starfshlutfall eins og launagreiðslur voru m.v. 1. maí 2008.  Bæjarstjórn stefnir að því að greiða starfsmönnum áðurnefndar eingreiðslur föstudaginn 16. maí nk.

Verkalýðsfélag Akraness býður félagsmönnum sínum á tónleika með Bubba Morthens. Tónleikarnir verða haldnir í Bíóhöllinni föstudaginn 30. maí kl. 20:00. Húsið opnar kl. 19:30

Hver félagsmaður fær afhentan einn miða á skrifstofu félagsins frá og með föstudeginum 16. maí á meðan þeir endast.

Formaður félagsins fór í hefðbundna vinnustaðaheimsókn til starfsmanna Íslenska járnblendifélagsins í morgun, en yfir 100 félagsmenn Verkalýðsfélags Akraness starfa hjá Íj í dag og hefur þeim fjölgað töluvert á liðnum misserum.

Eins og fram hefur komið fréttum að undanförnu þá hefur ríkt umtalsverð óánægja hjá kennurum Grundaskóla og Brekkubæjarskóla á Akranesi sem og öðrum starfsmönnum bæjarins í vetur, sem hafa vitnað til þeirra kjarabóta sem sveitarfélög á höfuðborgarsvæðinu og Reykjanesi hafa veitt sínum starfsmönnum á undanförnum mánuðum.

Eggert B Guðmundsson forstjóri HB GrandaÞað voru ískaldar kveðjur sem starfsmenn fiskimjölsverksmiðju HB Granda á Akranesi fengu frá forstjóra fyrirtækisins í dag.  En í viðtölum við fjölmiðla í dag segir forstjórinn að ástæður uppsagna starfsmannanna séu þær að ekki hafi náðst sá árangur í rekstri verksmiðjunnar sem stefnt hafði verið að lengi.

Síldarverksmiðja HB Granda á AkranesiÍ morgun fengu allir starfsmenn síldar- og fiskimjölsverksmiðju HB Granda á Akranesi uppsagnarbréf. Um er að ræða 5 starfsmenn sem sumir hverjir hafa áratuga langan starfsaldur hjá fyrirtækinu. Það er óhætt að segja að sá fantaskapur sem forsvarsmenn HB Granda sýna okkur Skagamönnum ætli engan enda að taka.

Mjög góð grásleppuveiði hefur verið hjá þeim félögum á Ísaki Ak 67 á þessari vertíð.  Þeir félagar eru búnir að fá yfir 16 tonn af grásleppuhrognum það sem af er þessari vertíð og verður það að teljast mjög góð veiði.  Besti róðurinn til þessa eru 25 tunnur í einni vitjun sem gerir um 2,5 tonn af hrognum.

Alvarlegt vinnuslys varð miðvikudaginn 30. apríl í steypustöð BM Vallár við Höfðasel á Akranesi. Slysið varð með þeim hætti að karlmaður á fertugsaldri fékk utan í sig stórt steypusíló sem féll úr 5 til 6 metra hæð. Hann var fyrst fluttur á Sjúkrahúsið á Akranesi en fljótlega þaðan með forgangshraði á Landspítalann í Reykjavík.  Samkvæmt upplýsingum sem formaður félagsins hefur aflað sér þá liggur maðurinn sem er félagsmaður í Verkalýðsfélagi Akraness á gjörgæsludeild Landspítalans, alvarlega slasaður og er honum haldið sofandi í öndunarvél.

Fjölmennt var í kröfugöngunni sem stéttarfélögin á Akranesi stóðu fyrir á 1. maí.  Að lokinni kröfugöngu þá var boðið uppá hefðbundna hátíðardagskrá í sal Verkalýðsfélags Akraness og eins og endranær var húsfyllir.  Formaður félagsins flutti ávarp að því loknu flutti Gylfi Arnbjörnsson hátíðarræðu dagsins og voru fundarmenn almennt mjög ánægðir með ræðu Gylfa.