Gríðarlegt kurr er komið í starfsmenn síldarbræðslunnar hér á Akranesi eftir að forsvarsmenn HB Granda gerðu samkomulag við Ísfélagið í Vestmannaeyjum um að landa þar einum kolmunnafarmi á hvert skip fyrirtækisins, en þau skip sem um ræðir eru Ingunn AK, Faxi RE og Lundey NS.

Grásleppuvertíðin hjá skipverjunum á Ísaki Ak 67 fer mjög vel að stað ef marka má fyrstu tvær vitjanir þeirra.

Í fyrri róðrinum fengu þeir félagar rúmt tonn af hrognum og í seinni róðrinum var aflinn um 700 kíló af hrognum.  Verður þessi afli að teljast nokkuð góður og gefur væntingar um að vertíðin geti orðið vel viðunandi.  Vissulega spilar tíðarfarið stóra rullu í því hvernig veiðarnar ganga. Í því samhengi skiptir miklu að ríkjandi séu landáttir í stað hafátta.

Síðasti dagur til að skila inn umsóknum um sumardvöl í orlofshúsum félagsins er næstkomandi föstudagur, 11. apríl. Aðsókn hefur verið gríðarlega góð eins og venja er og vinnur starfsfólk skrifstofu hörðum höndum að því að gera allt klárt fyrir úthlutun. Töluverð vinna liggur að baki hverri úthlutun þar sem mikilvægt er að allt fari rétt fram. Vonast er til þess að hægt verði að úthluta á þriðjudaginn 15. apríl og þá fá allir umsækjendur sent bréf, þar sem þeim er tilkynnt hvort þeir hafi fengið úthlutað eður ei.

Endurskoðendur félagsins eru nú búnir að leggja lokahönd á ársreikninga félagsins og er óhætt að segja að afkoma félagsins sé mjög góð.

Heildarhagnaður félagsins er rétt tæpar 80 milljónir og þar af er 24 milljóna króna hagnaður af félagssjóði. Þegar ný stjórn tók við árið 2003 nam tap á rekstri félagssjóðs tæpum tveimur milljónum.

Verkalýðsfélag Akraness óskaði eftir fundi ekki alls fyrir löngu með forsvarsmönnum Íslenska járnblendifélagsins þar sem mál er lúta að öryggismálum, samskiptum og stækkun verksmiðjunnar yrðu til umfjöllunar.

Verð á algengum mat- og drykkjarvörum sem verðlagseftirlit ASÍ kannaði verð á fimmtudaginn 27. mars hefur hækkað um allt að 10-30% frá því í maí í fyrra. Af þeim vörum sem skoðaðar voru hefur meðalverð hækkað mest á brauðmeti, pasta og hrísgrjónum, sem hefur víða hækkað um 20-30% á milli mælinga. Þá hefur meðalverð á íslenskum agúrkum hækkað um þriðjung og á sykri um 24%. Þær mjólkurvörur sem skoðaðar voru hækkuðu almennt minna en aðrar vörur eða um 2% - 5%.

Mikil gleði ríkti hjá starfsmönnum og forsvarsmönnum Laugafisks hér á Akranesi í dag.  Ástæða þessarar gleði liggur í því að í dag fékk fyrirtækið endurnýjað starfsleyfi sitt og gildir leyfið til 1. febrúar 2020. Í tilefni dagsins var keypt vegleg terta og formanni félagsins boðið í kaffiveitingar í morgun með forsvarsmönnum og starfsmönnum fyrirtækisins.

Í nótt landaði Lundey frá Vopnafirði 150 tonnum af kolmunna hér á Akranesi. Skipið varð fyrir einhverri bilun og gat því ekki klárað túrinn að fullu.

Hins vegar kom Faxinn strax í kjölfarið með um 1600 tonn af kolmunna sem er fullfermi. Stendur nú vinnsla í verksmiðju Síldarbræðslunnar á fullu yfir.  Ingunn Ak er nú á miðunum og samkvæmt upplýsingum sem formaður hefur fengið þá var Ingunin komin með rúm 400 tonn af kolmuna í gær.  Skipin eru að veiðum á Rockhallsvæðinu.

Verkalýðsfélag Akraness ásamt starfsmönnum Spalar gengu frá fyrirtækjasamningi fyrir nokkrum dögum á milli Spalar ehf. annars vegar og starfsmanna í gjaldskýli hins vegar.

Fyrirtækjasamningurinn hefur sama gildistíma og kjarasamningurinn á hinum almenna vinnumarkaði eða til 30. nóvember 2010.

Samninganefnd Starfsgreinasambands Íslands vegna kjarasamnings við ríkið kom saman til fundar í húsakynnum ríkissáttasemjara í gær.

Farið var yfir kröfugerð SGS vegna komandi kjarasamnings en meginkrafan er stórhækkun launa ófaglærðs fólks hjá hinu opinbera.

Viðræðunefnd Starfsgreinasambands Íslands mun koma saman til fundar á morgun vegna kjarasamnings SGS við ríkið. Núverandi samningur rennur út um næstu mánaðarmót. 

Fundurinn verður haldinn í húskynnum ríkissáttasemjara og hefst kl 13:30.

Ingunn Ak kom í land á skírdag með 1400 tonn af kældum kolmunna en skipið tekur rétt rúm 2000 tonn. Þetta er fyrsti kolmunaaflinn sem landað er á þessu ári til bræðslu hér á Akranesi. Aflinn veiddist á Rockhallsvæðinu.