Í morgun var haldinn fundur með þeim stéttarfélögum sem aðild eiga að kjarasamningi Elkem Ísland og Klafa ehf vegna þess ágreinings sem upp kom síðastliðinn föstudag hjá Ríkissáttasemjara. Sá ágreiningur fólst í því að RSÍ, Stéttarfélag Vesturlands og VR viðurkenndu ekki fulltrúa sína í samninganefndinni sem skipuð hafði verið vegna gerðar nýs kjarasamnings vegna áðurnefndra fyrirtækja.

Húsakynni ríkissáttasemjaraEins og fram kom hér á heimasíðunni í morgun þá óskaði Verkalýðsfélag Akraness eftir því við Samtök atvinnulífsins að haldinn yrði samningafundur vegna launaliðar Norðuráls sem rann út um áramótin. Það er skemmst frá því að segja að Samtök atvinnulífsins hafa svarað ósk félagsins og er fyrsti formlegi samningafundur um launaliðinn fyrirhugaður á föstudaginn kl. 13 í húsakynnum ríkissáttasemjara.  

Þónokkuð margir starfsmenn Norðuráls hafa haft samband við formann að undanförnu og óskað eftir skýringu á því hvers vegna viðræður vegna launaliðar kjarasamningsins sem rann út um áramótin, séu ekki hafnar.

Húsakynni ríkissáttasemjaraEins og fram kom hér á heimasíðunni þá unnu þrjú stéttarfélög sem eiga aðild að kjarasamningi Elkem Ísland stórfelld skemmdarverk í gær á fyrsta samningafundi undir handleiðslu ríkissáttasemjara. En VR, RSÍ og Stéttarfélag Vesturlands, undir forystu Signýjar Jóhannesdóttur varaforseta ASÍ, höfðu skrifað atvinnurekendum bréf þar sem þeirra eigin trúnaðarmönnum var hafnað í samninganefnd vegna viðræðna um nýjan kjarasamning.

Eins og fram kom hér á heimasíðunni í gær þá var fyrsti samningafundur samninganefndar Elkem Ísland og Klafa haldinn hjá Ríkissáttasemjara í dag. Sá ótrúlegi atburður átti sér stað við upphaf fundanna að þrjú stéttarfélög af þeim fimm sem aðild eiga að kjarasamningi Elkem höfðu haft samband við atvinnurekendur og Samtök atvinnulífsins og greint frá að þeir fulltrúar sem sætu í samninganefndinn væru ekki þar í þeirra umboði. Í samninganefndinni situr formaður Verkalýðsfélags Akraness, trúnaðarmaður rafiðnaðarmanna, trúnaðarmaður VR, trúnaðarmaður FIT, formaður FIT og aðaltrúnaðarmaður starfsmanna sem jafnframt er fulltrúi allra stéttarfélaga.

Myndir frá samstöðufundum starfsmanna Elkem og Klafa í gær eru nú aðgengilegar hér á síðunni. Hægt er að sjá þær með því að smella hér. 

Rétt í þessu lauk fyrri samstöðufundi starfsmanna Elkem Ísland og Klafa en eins og fram hefur komið hér á heimasíðunni þá stefnir í harða kjaradeilu vegna kjarasamnings áðurnefndra fyrirtækja.

Í morgun fundaði formaður félagsins með trúnaðartengiliðum Elkem Ísland. Trúnaðartengiliðirnir eiga sæti í aðalsamninganefnd vegna kjarasamninga starfsmanna Elkem Ísland við Samtök atvinnulífsins.

Samninganefnd Elkem Ísland fól formanni Verkalýðsfélags Akraness að vísa kjaradeilu starfsmanna til ríkissáttasemjara í morgun. Einnig fól samninganefnd Klafa ehf, sem er þjónustufyrirtæki sem sér um upp- og útskipanir á Grundartangahöfn, formanni að vísa sinni kjaradeilu til ríksisáttasemjara. En rétt er að geta þess að Klafi ehf er í 50% eigu Elkem Ísland og 50% eigu Norðuráls.

Í morgun var haldinn fundur í samninganefnd Starfsgreinasambands Íslands og var á þeim fundi samþykkt að skoða hugmyndir forseta Alþýðusambands Íslands um samræmda launastefnu. Fyrir liggja hugmyndir að þessari launastefnu og það er morgunljóst að þær falla alls ekki að þeirri kröfugerð sem Verkalýðsfélag Akraness stendur fyrir.

Um síðustu áramót rann launaliður kjarasamnings Norðuráls út. Á þeirri forsendu hefur Verkalýðsfélag Akraness fyrir hönd trúnaðarmanna verkamanna í verksmiðjunni, lagt fram kröfugerð fyrir verkamenn. Kröfugerðin var lögð fram rétt fyrir áramót og er heildarkostnaðarmat hennar um 27,5%. Hún er með sambærilegum hætti og kröfugerð vegna Elkem Ísland og starfsmanna í fiskimjölsverksmiðjunni.

Stjórn og trúnaðarráð Verkalýðsfélags Akraness, sem er jafnframt aðal samninganefnd félagsins, kom saman til fundar í gær. Formaður fór yfir með samninganefndinni þá alvarlegu stöðu sem upp er komin í kjaradeilu við Samtök atvinnulífsins og rakti fyrir samninganefndinni hvað hefur verið að gerast. Einnig fór formaður yfir stöðu annarra kjarasamninga sem félagið er aðili að eins og við Elkem Ísland, Klafa, sveitarfélögin og Norðurál.